රවීගේ සටහන

ඇය නොවිඳි දුක

2011-12-30T19:57:00.001+05:30

කඳුලක් නැතිව හඬමින්
යෙහෙලියක මිමිණුවා,
මා විඳි දුක
නොදී මගෙ දරුවනට
වෙමිය අම්මා
උතුම් ලොවටම...

මා සිත කකියයි,
ඈ නොවිඳි දුක්
විඳදරා හුන්
ගැහැණිය
කිම නූනේ
උතුම් ලොවටම...

සියපත (සිංහල යුතුරුලියන පුහුණු වැඩසටහන : Sinhala Typing Tutor)

2011-05-08T13:05:00.000+05:30

සියපත යනු . . .
සියපත නොහොත් සිංහල යතුරුපුවරු පරිශීලන තක්සලාව, සම්මත සිංහල යතුරුපුවරුව නිසි පරිදි පරීශීලනය කිරීමට පුහුණු කරවීම සඳහා නිපදවන ලද්දකි.

ශ්‍රී ජයවර්ධනපුර විශ්වවිද්‍යාලයීය පනස්වස් සැමරුම නිමිත්තෙන් පවත්වනු ලැබූ අධ්‍යාපනික ප්‍රදර්ශනය සඳහා මෙහි මුල් අනුවාදය සාදන ලදී. එමගින් පැරණි විජේසේකර යතුරුපුවරු සැකැස්ම භාවිතා කර පරිගනක යතුරුලියන්නට පුහුණුවීම් කල හැකිව තිබුනි.

මුල් අනුවාදය භාවිතා කර සාර්ථකවූවන්ගේ යෝජනා මත මෙම නව අනුවාදය සාදා ඇති අතර නව විජේසේකර යතුරුපුවරුව පුහුණුවිය හැකි ලෙස සකසා ඇත.

නව සියපතෙහි අඩංගු ගුනාංග

‍නව විජේසේකර යතුරුපුවරු වින්‍යාසය
ඉංග්‍රීසි සිංහල අකුරු සහිත පැහැදිලි යතුරුපුවරුව
යතුරුපුවරුව මත දිස්වන මගපෙන්වීමේ සලකුනු
නිවැරදි ඇඟිලි භාවිතයට මගපෙන්වීම
ප්‍රතිඵල විශ්ලේෂණය
නිම කර ඇති පාඩම් වල ප්‍රතිඵල සංශිප්තව බලාගත හැකිවීම.
බාගත කිරීමක් හෝ ස්ථාපනය කිරීමක් අවශ්‍ය නෙවේ..

http://siyapatha.zzl.org මෙම සැබැඳුමට ගොස් දී ඇති උපදෙස් පිළිපදින්න,

(Siyapatha is an online sinhala typing tutor that is not required to download or install any anything in your computer. Just visit http://siyapatha.zzl.org and register as a new student and you will be able to practice all the sinhala typing lessons available at the siyapatha. There are many features that can help you to improve the correctness and the speed of sinhala typing. To be updated with the new features and products please be a fan of Siyapatha Facebook fan page.)

මගේ වස් දඬු පරීක්ෂණය

2011-01-24T21:44:00.000+05:30

මම බටනලා පිඹින්න පටන් ගත්තේ මෑතකදි. හැමදාමත් එකම සංගීත භාන්ඩ ටික වාදනය කරන්න කම්මැලියි වගේ. ඒක නිසා වෙලාවක් ලැබුනම බටනලාව පිඹිනවා. ඔහේ ඒ ඒ වෙලාව‍ට හිතෙන සිංදුව වාදනය කරනවා. සමහර වෙලාවට එක සිංදවකින් පටන් අරගෙන අවසානේ වෙන සිංදුවකින් ඉවර කරනවා. හරි හැටි පුහුණුවක් නොලබා මට හිතුනු හිතුනු හැටියට පුරුදු වුනු නිසා බටනලාව අල්ලන ඉරියව්ව නම් වැරදියි. තව මොනවා මොනවා වැරදිද දන්නේ නෑ. කෝකටත් බලලම ඉන්න.
අපේ අම්මයි අකක්යි නම් සමහර වෙලාවට කැමති නෑ. මොකද මට ඕක පිඹින්න වෙලාවක් කලාවක් නැති නිසා. අනික ළඟ පාතක ඉඳන් අහනකොට සමහර විට අප්පිරියත් ඇති. බලලා හොඳ නරක කියන්න.

කතන්දරයක්

2010-11-11T13:26:00.000+05:30

නිතිනා යතුරු ඔබමින් පුර නව හෝරා
නිමවා එන සඳ විඳ හිරු තෙද සාරා
නැගුනා බසයෙ ඇදුනා මුල්ලට පීරා
ඇදුනා සිතට නෙක නෙක සිතුවිලි ධාරා

විඳිනා කලට නෙක හිරිහැර සතර අතින්
සිතුනා මුදන්නට සිරවූ වදන මුවින්
සලකා දිග පළල පෙනෙනා උන්ගේ ගතින්
වඩනා මෛත්‍රිය යෙහෙකැයි සිතුනි සැනින්

නවතා බසය දිගු කල හස්ථය හමුවේ
නැඟුනා ළඳක් දුටුවන සුරඟනක මැවේ
දැනුනා ඇයට යහමින් අප විඳින පවේ
මැලවී වතද මැකුනා සිනහවද මුවේ

ඇදුනා සුමුදු දෑතක් ඈ වෙත හෙමිහින්
දැනුනා චන්ඩි කිරිකැටියෙකු බව සැනෙකින්
වෙලුනා ඈ සෙනේ පොඩි එකියක විලසන්
හැඟුනා ඈ අහිංසක හැයි දුටු පමනින්

නවතා බසය අසලින් එක් නැවතුමක
බසිනා කෙනෙකි ලෙස ඇමිණි ඇති ඇමක
වැදුනා ඔහු අතක් සුරඟන වත කොනක
මිදුනා වදන්,සිහිකරවයි යකින්නක

ජංගම දුරකථන සඳහා සිංහල RSS කියවනයක් / J2ME සඳහා සිංහල භාෂා සහයට library එකක්

2010-05-25T00:37:00.001+05:30

මීට මාසෙකට විතර කලින් මෙම මෘදුකාංගයේම මුල් අවධියේ අනුවාදයක් පිළිබඳව මෙහි පල කලා. එහිදී ලැබුනු අදහස් වලට අනුව තමයි මෙහි ඉතිරි ටික හැදුවේ. ශාකුන්තල කිව්වා වගේ සිංහල rendering වලට මුල් අනුවාදයේ සෑහෙන්න වෙලා යනවා. ඉතිං ඒ rendering ක්‍රමය මුලුමනින්ම ඉවත් කරලා මගේම ක්‍රමයකට සිංහල render වෙන්න හැදුවා. වැඩිය මෙමරි භාවිතා නොවෙන විදියට ඉක්මනින් render කල හැකි සරල ක්‍රමයක් තමයි පාවිච්චි කලේ.

අද තමයි මේ assignment එක submit කලේ. ඉතිං මේගමන්ම අලුත් අනුවාදයත් දාන්න හිතුවා. මේකෙත් අඩුපාඩු ගොඩක් ඇති. හැකි අයුරින් ඒ ගැනත් දන්වන්න. ශාකුන්තල කිව්ව අර Bad UTF8 Format Exception එකට හේතුව වුනේ progress එක පෙන්නන්න දාපු form එක නිසා download වෙන දත්ත corrupt වීමයි. ඒ form එකත් ඉවත් කලා. දැනට download progress එක බලාගන්න ක්‍රමයක් නෑ.

මෙන්න මේදේවල් තමයි අනිවාර්ය අවශ්‍යතාවයන්:

·
Device Configuration: CLDC 1.0 or Later version

Device Profile: MIDP 2.0 or Later version

Minimum Java heap size: 2MB

Input: Classic Mobile Key layout / QWERTY Mobile Key Layout / Touch Mobile

Connections: Internet

මෙහි font faces FMGangaani font එකෙන් ලබාගත් ඒවා වේ. නමුත් Unicode අක්ෂර පමණක් මෙමගින් render කල හැක. මෙහි මම භාවිතා කල සිංහල අක්ෂර සහයක කොටස වෙනම library එකක් ලෙස සාදා ඇත. එය ඕනෑම j2me මෘදුකාංගයක් සමග සම්බන්ධ කල හැකි ප්‍රමාණයෙන් ඉතා කුඩා library එකකි. කොතරම්ද යත් සාමාන්ය font file එකකටත් වඩා පුමාණයෙන් කුඩා වේ. මෙම assignment එකේ ඇගයීම් කටයුතු ඉවර වූ පසු එම library එකද පොදු භාවිතය සඳහා මුදාහරීමට අදහසක් ඇත. දැනට අවශ්‍ය කෙනෙක් වෙතොත් මාගේ ඊමේල් ලිපිනය හරහා දන්වන්න (ravimal9ඇට්gmailඩොට්com).
Touch screen inputs මුල්වතාවටයි software එකකට සම්බන්ධ කරන්නේ. නිසි අයුරින් වැඩ කරන්නේ නැතිනම් දන්වන්න. මෙතනින් බාගන්න.

Download SinhalaRSS.zip

දැනුනි නම්

2010-05-08T16:50:00.000+05:30

දැනුනි නම් මුලු ලොවම දවාලන බව ඉතින්
නොදල්වමි ගිනි මැලක් රැකෙන්නට සිසිලසින්
අඟුරු අලු ශේෂ වූ කාලවන් මිහි මතින්
ගලන ගංඟා රුහිරු කෙලෙස නවතනු සිතින්

ජංගම දුරකථන සඳහා සිංහල RSS කියවනයක්.. (සිංහල නැතුව සිංහල කියවන්න)

2010-04-11T13:41:00.000+05:30

මේ අධ්‍යයන වාරයෙත් අපිට අලුත් දෙයක් කරන්න අවස්ථාව ඇති පාඨමාලා දෙකක්ම කරන්න ලැබෙනවා. ඉන් කේවල ඇගයීමට මම හිතුවා සිංහල RSS කියවනයක් හැදුවනම් ගොඩක් ප්‍රයෝජනවත් වෙයි කියලා. සාමාන්යයෙන් ජංගම දුරකථනයට සිංහල ෆොන්ට් දානවා කියන එක අමාරු වැඩක් කියලා දන්නවනේ. අනික ඒ සඳහා අවශ්‍ය කාලය, දැනුම සහ මෙවලම් හොයගන්න එක හැමෝටම කරන්නත් බෑ. එහෙම අමාරුවෙන් දැම්මත් rendering ප්‍රශ්න නිසා කියවන්නත් අමාරුයිනේ. ඒ නිසා අඩුගානේ සිංහල බ්ලොග් සහ සිංහල ප්‍රවෘත්ති ටිකවත් සිංහල ඇති නැති ඕනෑම ජංගම දුරකථනයකින් බලාගන්න පුලුවන් මෘදුකාංගයක් හැදුවානම් ප්‍රයෝජනවත්වෙයි කියලා හිතුනා.

දැන් ඒ වැඩේ පටන් ගත්තා. බොහෝදුරට නිම කර අවසන්. මගේ දුරකතනය ඇතුලු තවත් දුරකථන කිහිපයක එය හොඳින් වැඩකලත් ඉන්දරේගේ සහ වෙනත් යාලුවෙකුගේ දුරකථන වල එකිනෙකට වෙනස් error messages පෙන්නුවා. ඒ නිසා මෙහි ඉතිරි කොටස්　develop කිරීමට මත්තෙන් ඔබ සැමගේ අදහස් දැන ගැනීමට අදහස් කලෙමි. දැනට ඔබ කැමති feed addresses bookmark කරගෙන එහි සියලුම සිංහල posts වල titles සිංහලෙන් කියවීමේ හැකියාව මෙමෙ මෘදුකාංගය සතුයි. සම්පූර්ණ post එක කියවීමේ හැකියාව පසුව එකතු කිරීමට බලාපොරොත්තු වෙනවා. ඊට අමතරව වෙනත් එකතු කර යුතු අංගයන් යෝජනා කල හැකි නම් හොඳයි. තවද සියලු ගුණ අගුණ පිළිබඳ විස්තර බලාපොරොත්තු වෙමි.

පහත සබැඳියෙන් බාගත කරගත හැකියි. (මෙය UNZIP කර ‍.jar file එක install කරන්න)
http://www.fileden.com/files/2009/2/26/2338957//SinhalaRSS_Ravi.zip
Device Profile :
MIDP 2.0

(මගේ බ්ලොග් එකේ feed address එක පෙරනිමියෙන් ඇතුලත් වෙන්නේ ප්‍රෝමෝටිං වලට නෙවෙයි. ‍පරීක්ෂා කර බලන්න පහසු වෙන්නයි. ;) )

මට පෙර ආ නිසා..෴

2010-03-20T13:11:00.000+05:30

සිනහව නුඹ නිසා
සොමි සඳ නුඹ නිසා
අපි එක තැන නිසා
පිදි මම සෙනෙහසා

මට පෙර ආ නිසා
ලෝ දම් ඇති නිසා
මව් පිය දෙන කසා
බොමි වසමින් ඇසා

දෙනෙත පෙම් කරන තුරු

2010-01-03T23:53:00.000+05:30

එකම හිරු යට එකම පොළොවක විඳිති රූ සර
   එකෙකු ලෙසිනේ
එකම හඳ ය‍ට එකම යහනක විඳති නිදි සුව
   එකම ලෙසිනේ
එකම සංතාපයක වෙලෙමින සලති කඳුලැලි
   එකම ලෙසිනේ
එකම වත රැඳි නයන සඟලක් පුරති මිතුදම්
   එකම ලෙසිනේ

එකම හිරු යට නැවතුමක එක හැඳින සිත් අප
   එකෙකු ලෙසිනේ
එකම සඳ යට එකම පැතුමක සිහින මැවුවේ
   එකම ලෙසිනේ
හඬන නෙතු යුග හඬන තුරු තුටු කඳුලු පිරි
   පෙම්වතුන් ලෙසිනේ
පුරමු මිතු දම් නොවී පෙමතුන් එකම වත රැඳි
   නයන ලෙසිනේ

මූණූ පොතෙන් අතීතෙට

2009-11-22T09:08:00.000+05:30

යතුරු ලා දොරගුලු හැර
පෙරළා මුල් පිටුවට
බලමි රස කර කර
සකි ලා ගිය අතීතය

අතීතය ‍නම් මෙතෙකැයි
තත්පර පෑ ගණන් මෙලෙසයි
තනිව හඬනා අතීතෙට
මුසු කරමි මතකය සෙනෙහසින්

වත්මනද පසෙකින්
පෙළ ගැසී සකියන්
ඇඟිලි මැවු වැකියන්
මුසුවී අතීතෙට රහසින්

නුඹ වේද මගෙ සකි
මම දනිමි නුඹෙ සකි
සසලවු මිතුදමකි
කම් නැත තවත් සියයකි

නෙත යොමා සැමදෙන
රැක හිඳි සොයා වත්මන
හමුවුනේ හිඳි සැම දින
අතීතය මිස නොවේ වත්මන

රූසිරි විඳින බඹරිඳු නොදුටුවද තව

2009-11-10T19:19:00.001+05:30

ඇතිමුත් කොතෙක් එක්පෙති මල් ළඟපාත
දැකි මුත් එසඳ පෑ කිවියෙන් ඇළපාත
විඳිණෙමි රූ රස ඔබ දුටු දින මෑත
පිපුනේ ඇයිද අත දිග නැති දුර ඈත

වර වර පිපි කමල නුඹ සිනහවද මුව
බල බල සිහි කලෙමි පෙර හුරුපුරුදු භව
සර සර නොනැගුවෙද දැවටුණු පිනි බිඳුව
රූසිරි විඳින බඹරිඳු නොදුටුවද තව

මිහිදුම් සේල විසිරි ඇති හැම තැනම
උයනෙක කොනක සැඟවී හුන් නුඹ දැකුම
බිඳුනා සේය එක් සිහිනෙක හිටිවනම
රූසිරි විඳින අන් බඹරෙකු ඇය ළඟම

ඉවසන්ට බෑ අම්මේ..

2009-10-28T22:46:00.000+05:30

ගිරි පලන් රුදු යකුන් පැමිණෙයි
ලෙය පිපාසාවුන් බිලි සොයයි
තුරුලුකර දරු සිත් සනසවයි
පැටවුනේ නුඹ තවම ළපටියි

රුදු වදන් උන් බැන ගියාවේ
දඬු මුගුරු හිස් අත ගියාවේ
කල පව්න් උං ඵල ගෙනාවේ
ඉතිං නුඹ ඇස් පියවුනාවේ

රුදු වදන් අප අසා සිටියා
දඬු මුගුරු හිස් ලූ අත ගියා
වැසූ නෙත් තෙත් වී ගියා
හිඳිනු බෑ පෙර සිටි නියා

අපි මිතුරෝ වෙමු.

2009-10-16T19:17:00.001+05:30

ගඟක් ඇදෙයි මහ සයුර සොයාගෙන
වැවක් පිරෙයි වැව් බිම අතුරාගෙන
කෙතක් දිළෙයි රන් කරල් පැසීගෙන
බතක් ඉදෙයි සාගින්න නිවාලන

ඉරක් ඇදෙයි නිල් අහස අරාගෙන
දිනක් මැවෙයි හද පිරි පැතුමන් ගෙන
හෙටක් නැවුම් සිහිනෙක රඳවාගෙන
රටක් හදමු අපි අපි අඳුනාගෙන

පිනි බිඳුව

2009-10-03T13:04:00.000+05:30

නෙලුම්පත මත රැඳුනෙ පිනි බිඳුව නුඹ නොවෙද
දිය රළට මද නලට නැලැවුනේ නුඹ නොවෙද
අහස් කුස සිසාරා වැටුණු නුඹ මයෙ නොවෙද
විල් දියේ යලිත් නුඹ පිනි බිඳුවේ නුඹ කොහිද

අයදිමි සමා...

2009-09-29T17:31:00.000+05:30

බෙරිහන් දී කෑ ගසමි
නෑසුනි නුඹට
අත දිගුකර ඈත පෙන්වමි
නොපෙනුනි නුඹට
සිත ගුලි කර හද මත තබමි
නොදැනුනි නුඹට
තවත් මා නුඹව නොපතමි
අවැසිද මා නුඹට
නවතිනු මදකට...
මටද නෑසුනිය
මටද නොපෙනුනිය
මටද නොදැනුනිය
නුඹ කල කී දෑ
අයදිමි සමා...

ජංගම දුරකතන සඳහා දියුණු කල SMS වැඩ සටහනක්. (source එක සමග)

2009-09-21T22:50:00.003+05:30

මේ දවස් වල වැඩ වැඩි හින්දා මාසයක් තිස්සේ බ්ලොග් එක වේලෙනවා. ගිය බුහස්පතින්දා university එකෙන් ඇගයීමක් විදිහට java ආශ්‍රිත ව්‍යාපෘතියක් කිරීමට ව්‍යාපෘති යෝජනාවක් හදාගෙන එන්න කිව්වා. ඒකට අදහසක් හොයමින් ඉන්නකොට පහුගිය දවස් වල "programming උණ" හේතුවෙන් හදපු මෘදුකාංග වගයක් හම්බ වුනා. ‍ මේක මීට අවුරුදු 2 ට විතර කලින් හදපු එකක්. මෙම වැඩසටහන නොමිලයේ භාවිතයට මුදා හැරියත් වැඩි දෙනාගේ අවදානය යොමු වුනේ නිර්මාණයට යොදා ගත් තාක්ෂණය අවබෝධ කරගැනීම පිළිබඳවයි.
වැඩසටහන් සැලසුමේ සිට සියලු ඇල්ගොරිදම මා විසින්ම නිර්මාණය කල නිසා කිසිදු බාධාවක් නැති හෙයින් මෘදුකාංගයේ source එක (Netbeans project) බෙදාහදා ගැනීමට තීරණය කළෙමි.

මෙහි විශේෂත්වය වන්නේ 1 කෙටි පනිවුඩයකින් යැවිය හැකි අකුරු ප්‍රමාණය වැඩි කර තිබීමයි. එය 207 ක් දක්වා වැඩි කිරීමට හැකිවුනා. මෙහිදී GSM/WCDMA 7-bit encoder එකම භාවිතා කල නමුත් මෘදුකාංගය තුලදී 5 හෝ 6-bit encoding එකක් භාවිතා කරන ලදී. මෙය නිර්මාණය කිරීමට පෙර කිසියම් හෝ encoder එකක ව්‍යූහය නොදැන සිටි බැවින් මෙහි අන්තර්ගතය කිසිදු ප්‍රමිතියක් අනුගමනය නොකරන බව කිව යුතුයි. එසේ වුවත් මෙය සාර්ථකව ක්‍රියා කරන අතර sony erricsson w810i, w200 සහ nokia දුරකථන බොහොමයක හොඳින් ක්‍රියා කර තිබෙනවා.

ඕනෑම අධ්‍යාපනික කටයුත්තක් සඳහා අවශ්‍ය ලෙස වෙනස් කරමින් මෙය භාවිතා කරන්න. මෙහි යම් කොටසක් භාවිතා කර වැඩසටහන් නිර්මාණය කරන්නේ නම් එය නොමිලයේ භාවිතයට මුදා හැරීමට කාරුණික වන්න.

code commenting දුර්වල මට්ටමක පවතියි. මෙහි මහ ලොකු දෙයක් කර නොමැති නිසා තේරුම් ගන්න අපහසු වෙන එකක් නෑ.. ප්‍රශ්න තියනවනම් අහන්න.

මෙතනින් project source එක බාගන්න.
මෙතනින් activation software source එක බාගන්න

SMS application එකේ පෙන්වන UID එක activation application එකට දමා අදාල key එක ලබාගන්න. Applications දෙක තිබෙන්නේ දුරකථන දෙකක නම් activation key එක කෙලින්ම අදාල field එකට send කලහැකියි.

නුඹෙ රුව

2009-08-11T13:05:00.004+05:30

තිත්ත කල්කය සමග මධු මී
සෙත සදයි ගත සිත සුවේ
අතැඹුලයි ඇල් පැන් පොදයි
අමරස මවයි දිව අග මුවේ
අඳුරු සිසිවත ලැබ පබා රිවි
දුරු කරයි ගනඳුර ලොවේ
රුව නොවෙයි නුඹෙ ගුණ රුවයි
මගෙ ජීවයයි මේ මුලු භවේ

ඇයි නුඹ විතරක්?

2009-08-08T16:58:00.004+05:30

විහිදෙන මා තෙද ලද නුඹ හැම යෙහෙළී
මුවහස පා ගී මුමුණයි වී මුකුලී
පෙරයම හිනැහි හිනැහී උන් සුපුල් මලී
නුඹ විතරක් කිම වත සඟවනු වියැළී

"පෙර දිනයක මා පෙම් කල යුවතිය" ට ඇත්තේ වෙනත් තේරුමක්ලු

2009-07-24T14:22:00.004+05:30

පන්ඩිත් ඩ්බ්.ඩී. අමරදේවයන් ගයන සුනිල් සරත් පෙරේරා විසින් රචිත "පෙර දිනයක මා පෙම් කල යුවතිය" යන ගීයේ අරුත රචකයාට සාපේක්ෂව බොහෝ වෙනස් බව මම දැන ගත්තේ අද උදේ රූපවාහිනියේ ගිය වැඩසටහනකිනුයි. මට යන්තමින් වගේ එය ඇසුනද පසුව මම එම ගීතය දෙස රචකයාගේ කණ්නාඩිය දමා බලන්නට වීමි. පුදුමය නම් දැන් මම රස විඳින්නේ පෙර හුන් ගීතයට හාත්පසින්ම වෙනස් ගීතයක් වීමයි. මෙහි නියම රසය විඳීමට රචකයාගේම කණ්නාඩිය පැළඳිය යුතු බව මගේ අදහසයි.

රූපවහිනියේ විකාශය වූ වැඩසටහනෙන් මට ගත හැකිවුයේ මෙය "තම බිරියට කියන ගීයක්" යන්න පමණයි. එලෙස බලන කල එම තේමාවට මෙම පදරච වඩාත් ගැලපෙන බව පසක් විය. දැන් මට හැ‍ඟෙන ආකාරයට මෙය පෙම්වතෙක් තම පෙම්වතියව විවාහ කරගෙන එකම නිවසක දුරස්ව වෙසෙමින්, බිරිඳගෙන් එසේත් නොමැතිනම් සිය පුතුගේ මවගෙන් ගිලිහුණු තම පෙම්වතිය සිහි කරමින් ගැයෙන ගීයකි.

එක් පැත්තකින් මෙය විරහ ගීයකි. තව පැත්තකින් මෙය සියලු කාන්තාවන් ගැන කෙරෙන සෞන්දර්යාත්මක විග්‍රහයකි. කෙසේ වුවද තවමත් රස විඳිය හැකි ගීතයකි. සිංදුව නොදන්නා අය‍ට සහ රචකයා අදහස් කල තේරුම නොදත් අය වෙනුවෙන් ගීතයේ පදමාලාව මෙහි ඇතුලත් කරමි. පරණ සිදුවක් අලුත් විදිහකට රසවිඳින්න ආරාධනා.

පෙර දිනයක මා පෙම් කල යුවතිය
සිය පුතු නලවනවා
මගේම ගීයක් නැලැවිලි ස්වරයෙන්
ඈතින් මතු වෙනවා

නුරාව වෙනුවට ඉඳුනිල් දෙනයන
දයාව වෑහෙනවා
සිනාසුනෙමි මම අවිහිංසක ඇය
කෝල බැලුම් හෙලුවා

හිරුට සඳුට නොකියා හොර රහසේ
කාලය වියැකෙනවා
නෙත් අදන්නට බැරි ලෙස රූසිරි
කෙමෙන් මැකි යනවා

එදා වගේ තවමන් වැට අද්දර
නාමල් පූබුදිනවා
නොකා නොබි දුක් වින්ඳ අතීතය
යළි මට සිහිවෙනවා

ගායනය : පන්ඩිත් ඩ්බ්.ඩී. අමරදේව
පද රචනය : සුනිල් සරත් පෙරේරා

සිංදුව අහන්න

විහඟේ නොහඬන්

2009-07-24T09:55:00.003+05:30

වදුලේ මන බඳින සියුමැලි මල් ගොමුවේ
සුවඳේ මද නළද මන මත් වී නැලැවේ
අඳුරේ සුපුල් මල මුකුලිත වී මැලැවේ
විහඟේ නොහඬන් පරවුණු මල් ගොමුවේ

සොඳුරු ගං දිය

2009-07-14T11:26:00.002+05:30

අටලුවට වී කෙලෙති නිල් දිය
විඳිති සුමිහිර නිදහසේ දිය
පහස විඳිනට සොඳුරු ගං දිය
බසිනු මැන දැන ගැඹුර නිල් දිය

විදුදය ඉංග්‍රීසි සිංහල ශබ්දකෝෂය 1.4 වන අනුවාදය

2009-07-07T23:35:00.002+05:30

‍හැමෝගෙම යෝජනා සලකා බලලා ඔන්න මම අලුත් අනුවාදය හැදුවා. ගොඩක් අය කියලා තිබ්බා වචන type කරන්නත් තැනක් තිබුනනම් හොඳයි කියලා. ‍මුලින්ම මම ඒ පහසුකම ඇතුලත් කලා. ඊට අමතරව පහත සඳහන් පහසුකම් එකතු කලා.

සිංහල වචන වලට සමාන ඉංග්‍රීසි වචන සෙවීමේ පහසුකම - මුල් අනුවාදයේ ඉංග්‍රීසි වචන තේරූ විගස එහි සිංහල සමාන වචන එන ලෙසම දැන් සිංහල වචන වල තේරුමත් සෙවිය හැකි ලෙස සාදා ඇත.‍
තෝරාගන්නා ලද ඉංග්‍රීසි හෝ සිංහල වචනයක් ශබ්ද‍කෝෂයේ නොමැති විට එයට අදාලව ඉංග්‍රීසි හා සිංහල වචන යෝජනා කරයි. යෝජිත වචන වල තේරුම්ද එලෙසම double click කිරීමෙන් ලබා ගත හැක.
සිංහල හෝ ඉංග්‍රීසි ලෙස තෝරා ගැනීමකින් තොරව පරිගණකයේ වූ ඕනෑම ඉංග්‍රීසි හෝ සිංහල(unicode) වචනයක තේරුම පෙර ලෙසම බලා ගත හැකිවන ලෙස සකස් කර ඇත

මෙහී භාගත කිරීමේ හැකියාව තාවකාලිකව නවතා ඇත. 2009-July-21

මෙහි ඇති හොඳ නරක සහ තවත් ඔබගේ යෝජනා ද මට දන්වන ලෙස ඉල්ලා සිටිනවා...

සහයෝගය දුන් හැමෝටම තුති....

මෙතරම්ම සොඳුරුද?

2009-06-30T09:44:00.004+05:30

නිසි කල නිසි රස ලැබගෙන දෙන්නේ
නිති මා සුවපහසුව සලසන්නේ
නිති මැවු මා රුව නැති එක සිහිනේ
නොම මැවු බව පොඩි මා හද දන්නේ

සිනහව පමණයි මා හඳුනන්නේ
සෙනෙහස පමණයි මා අමතන්නේ
ඔබ හද රිද්මය සවන වැකෙන්නේ
හෙට දින ලොව සොඳුරුද මෙලෙසින්නේ

මෙන්න මෙහෙමයි පාවෙන්නේ(ඩේවිඩ් කොපර්ෆීල්ඩ්ගේ රහස)

2009-06-19T23:22:00.001+05:30

පොඩි කාලේ ඉඳලම මට එක එක ජාතියේ උණ තිබ්බා. සංගීත උණ, සොෆ්ට්වෙයාර් උණ, මාර්ෂල්ආර්ට් උණ වගේ නානාප්‍රකාර උණ වර්ග ගණනාවක් දරුණු ලෙස වැළඳිලා තිබුනා. මෑතකදී මට මැජික් උණකුත් හැදුනා කියමුකෝ. අවුරුදු කීපයකට කලින් වැළදුනු මේ උණ හින්දා අමරුවෙන් සරළ මැජික් ටිකක් පුරුදු වුනා. ඔව්වා මම ඉස්කෝලේ යාලුවන්ට පෙන්නන්න ගිහින් අනන්තවත් චාටරේ කාලා තියනවා (මැජික් එකේ හොර අහුවෙලා). ඔන්න ඔය හින්දා තමයි මම street magic වගේ ඕනෑම තැනක කරන්න පුලුවන් මැජික් වර්ග ගැන හොයන්න ගත්තේ. මම මුලින්ම බැලුවේ ඩේවිඩ් බ්ලේන්ගේ හා ඩේවිඩ් කොපෆීල්ඩ්ගේ වීඩියෝ බලල ඉගෙන ගන්න කියලා... කොහෙද.. ඒවා එහෙම ලේසියෙන් හොයාගන්න පුලුවන් ඒවා නෙවෙයි. ඒ‍‍ඟොල්ලෝ හුඟක් දක්ෂ පලපුරුදු අයනේ. ඒත් කොහොම කොහොම හරි මම එහෙන් මෙහෙන් අහුලගෙන රහස් කීපයක් හොයා ගත්තා (ඉහත වීඩියෝ දර්ශනයේ අඩංගු වන්නේද අත්හදා බැලන ලද ඩේවිඩ් කොපෆීල්ඩ්ගේ මැජික් එකක්).

ඒත් එම රහස් හරිම සරළයි. ‍ඔවුන්ගේ මැජික් ජනප්‍රිය වීමට ප්‍රධානතම හේතුවත් ඒකම කියලයි මට හිතෙන්නේ. කොච්චර සරළද කියනවනම් එම මැජික් වල රහස එලි කලත් මිනිස්සු ඒවා පිළිගන්න සූදානම් නැහැ. මොකද කියනවනම් ‍විශාල සෙනග කන්දරාවක් මැද්දේ ඉඳගෙන මේවගේ සරල දෙයකින් මිනිස්සු අතිශයින් පුදුමයට පත්වෙන නිසා ඔවුන් ඒවා පිළිගන්න මැලිකමක් දක්වනවා.
මැජික් ශිල්පීන් කියන්නේ මනුෂ්‍යයාගේ හිත ගැන හොඳ අවබෝදයක් තියන පිරිසක්. හරියටම කියනවනම් මනුෂ්‍ය ඉන්ද්‍රීයන්ගේ දුර්වලතාවයන් හඳුනා ගත් පිරිසක්. ඒවගේම මනුෂ්‍යයනගේ හිත් පාලනය කල හැකි පිරිසක්. ඉහත වීඩියෝ දර්ෂණයේ ඇති මැජික් එක ඊට හොදම උදාහරණයක් (එහි රහස එලි කලත් එය ඔබ පිලිනොගන්නා නිසා එය රහසක් ලෙසම තබා ගන්නවා). මට නම් එහෙම හැකියාවක් නැහැ. නමුත් මැජික් ශිල්පියාගේ හිත තේරුම්ගන්න පුලුවන් නිසා සමහර රහස් අනුමාන කරන්න පුලුවන්. කෙසේ වෙතත් දැන් මේක මගේ විනෝදාංශයක් වෙලා.
තවත් මෙවැනි උණ රෝගීන් සමග අත්දැකීම් හා දැණුම හුවමාරු කරගන්න කැමතියි.

ඈ කව්ද?

2009-06-12T12:04:00.004+05:30

නිවන්නට මා ගතේ සරතැස
නිවන්නට මා සිතේ සරතැස
මවන්නට මා දිවග මිහිරස
සිඹින්නට අවසරයි මුවහස

පැහැය රන්වන් පුබුදුවයි ඇස
සුවද සුව ඇත ලෙස අමා රස
මුවට මුව බැඳ නිවාලූ පවස
රසට සම ලොව නෑ තවත් රස

නිශා යමේ නෙත් අයාගෙන
පෙළින් පෙළ ගිල කුරුටු නලියන
කරමි සිහි නිති හිස්ව හතිලන
නුඹෙන් ලද සුව පහස මා මන

නිවූ පවසින් මැකී උණුහුම
සීත නුඹ දින ගනන් තනිවම
ගතින් වියැලී දියක් නොදැකම
කුහුඹුවන් රජ කරයි නුඹඉම

අන්තර්ජාලයේ මගේ කොම්පියුටරේ - online virtual desktop

2009-06-08T18:35:00.002+05:30

මේක online virtual desktop එකක්. 15gb විතර ඉඩක් දෙනවලු. අනික මේක සම්පූර්ණයෙන්ම නොමිලේ. inbuilt applications එහෙමත් තියනවා. ඊට අමතරව file share කරන්න, chat කරන්න, mobile එකෙන් access කරන්න වගේ දේවල් කරන්නත් පුලුවන්. alpha අනුවාදයක්. ඒත් මටනම් නියමයි. මේ වගේ අත්දැකීමක් ලබාගත්තේ මුල්වරටයි. ගිහින්ම බලන්න.

http://g.ho.st/

නැති සඳ සවිය

2009-06-05T00:07:00.002+05:30

ඇති සඳ සවිය
නැති අග හිඟය
නැති සඳ සවිය
නුබ ගැබ වැනිය

ඇති සඳ සවිය
ඇති කත සිරිය
නැති සඳ සවිය
ඇත මුව බිරිය

හැර යන හිරු

2009-05-30T21:25:00.004+05:30

මා ලොව තනිකර
නිහඩ අදුරක,
නුඹ ලොව පුබුදයි
රැය පහන් කර,
අදුරේ මමද
අරුණේ නුඹද
නොවෙද අප
එකම ලොවක....
කිම මේ වෙනස....

මා නෙත කදුල

2009-05-24T23:22:00.002+05:30

නෙතින් සැලුන කදුලු බිංදුව
සැනැහුවා නුඹ මා තැවුල් සිත
සිනහවක් ණයයි මා නුඹට
යළි නෙතගින් පැන
අලුත් ලොව දකින්නට

මියෙන-නොමියෙන-මිනිසුන්-නොමිනිසුන්

2009-05-19T21:06:00.002+05:30

නෑයන් නොනෑයන් ගම් බිම් හැරදාලා
නෑයන් සොයා ඇදුනා සරණක් පතලා
නෑයන් වෙසෙන් සිය නෑයන් අවි අත ලා
නෑයන් නසයි උන් නොමියෙන බව සිතලා

හඩා වැටෙන මව් පියවරු සනහාලා
ගලා හැලෙන රත් ලේ බිදු නවතාලා
අදුර තුලින් පියඹන වෙඩි නොතකාලා
ළය දෙයි විරුවන් නොමියෙන බව සිතිලා

වැඩුමට නොම දුන්නත් කිරි කර රුහිරූ
මවුනි නුඹයි තුන් හෙළයම තුල ඉසිරූ
රැකුමට මවුන් සැලුවා ගංගා රුහිරූ
එවන් විරු පුතුන් හට නිවනත් නුදුරූ

මගේ මුල්ම කවිය

2009-05-19T21:04:00.001+05:30

බලා හිද මම කල්පයක්
ලියන්නට වුනෙමි පෙම් කවක්
හමා ආ මිහිරි සුළගක්
ගෙනාවා සුදු මුදු පතක්

යොමා හද තුල තෙමා පන්හිද
පියා දෑසම බලා පුන් සද
නිමා කර මා හදේ සංහිද
නුහුරු සුරතින් ඇරඹුවා හිද

අතට ගෙන ඒ සුදු සුමුදු පත
බලා සිටියා තිගැස්සී සිත
ලියන්නට පෙර කවක් මගෙ අත
කවක් අන්සතු එහි ලියවි ඇත

හමාගෙන ආ සීත සැඩ සුළග
ගෙන ගියා මුදු පත හද සමග
ලියන්නට තව කවක් පෙම ළග
මගේ සිත අද නොමැත මා ළග

සොදුරුතම දසුන

2009-05-19T20:52:00.003+05:30

සොදුරුතම දසුන
අභියසදි පිදෙන
ආදරේ වදන
වදනක්මැ නිතින

ආදරේ වදන
අරුතෙන්ම පිදෙන
ස්නේහයේ ලලන
සොදුරුතම දසුන

අවේලාවේ....

2009-05-19T20:49:00.003+05:30

දිවා රෑ වෙහෙසෙමින් පොත් ගනන් කියවමින්
නිබන්දන සටහන්ද පැවරුම්ද සකසමින්
උදාවෙන අලුත් දින දේශනය සිහිවෙමින්
සැබෑ නොවෙනා හීන දකිනවා නිදිමරන්

පොතක් කොළයක් සමග පෑනක්ද වෙයි අතක
දිව ගොසින් ඉදගතිමු ශාලාවෙ කෙලවරක
බලා වටපිට සොදට ලැබූ නිදහස් ඉඩක
ගයයි ගී ලෙසට මැඩියන් වසන නිල් විලක

සිනහවක් නංවමින් ඇදෙයි ශාලාව වෙත
හුනස්නෙන් නැගිටිම්න් ඇස යවමු ඝටිය වෙත
පොතත් පෑනත් රැගෙන තබා එය මේසෙ මත
ළග තිබුණු හිත රැගෙන විසි කරයි දුර ඈත

විභාගය අත ළගයි හිත මගේ ඇද ළගයි
කොළ හැලුනු සටහනේ එකමඑක හිස් ගොඩයි
හෙට දිනේ දකින්නට පිහිට අප කුප්පියයි
කප්පරක් වැඩ ඇතිව මං මෙතන කවි ලියයි

නාඩි වාක්‍ය - ඇත්තක්ද? නැත්නම් තවත් හොර සාත්තර කරුමාන්තයක්ද?

2009-05-03T22:39:00.001+05:30

ඔවුන් කියන හැටියට ඉපදෙන සෑම කෙනෙකුගෙම වාගේ ජීවන තතු එක් රැස් කර පුරාණ සෘෂිවරු කණ්ඩායමක් පුස්කොල පොත් වල ලියා තිබෙනවලු. ඒවා ඔවුන් ඉන්දියාවෙන් ලංකාවට රැගෙන ආවේලු. ඔවුන් අප ගැන විෂ්මයජනක ලෙස හෙළිකරන ඇතැම් තොරතුරු නිසා ඉහත කී දෑ අවිෂ්වාස කිරීමටද බැරිය. එහෙත් සමහර වැරදි තොරතුරු නිසා විෂ්වාස කිරීමටද බැරිය.
මේ පිළිබද මාගේ අත්දැකීම් කිහිපයක් විස්තර කිරීමට කැමැතියි. අවුරුදු කිහිපයකට පෙර අපට මේ පිළිබදව ආරංචි වී මාගේ පියා නාඩි වාඛ්‍ය ඇසීමේ අරමුණින් ඔවුන්ට අත් සලකුණු ලබාදුන්නා. දින කිහිපයකට පසු අදාල ස්ථානයට ගිය විට රැකියාව කුමක්දැයි විමසුවාලු. එලෙසම විවිධ ප්‍රශ්න අසමින් පුස්කොළපොත් එකින් එක ‍තෝරා ඉවත් කලාලු. එහත් මාගේ පියා ලබාදී තිබෙන එකම සත්‍ය පිළිතුර වූයේ රැකියා ක්ෂේත්‍රය පමණයි. එම පිළිතුර ලද සැනින් ඔවුන් එක් පුස්කොළපොතක් තෝරා කියවාගෙන ගියාලු. එය පටිගතකර දෙන නිසා මටද එය අසන්නට පුලුවන් විය.
එහි මෙම විස්තර ඇතුලත්ව තිබිනි. එනම්

පියාගේ නම (නිවැරදියි)
අත්තාගේ නම (පියාගේ පියා) (නිවැරදියි)
අත්තම්මාගේ නම (පියාගේ අම්මා) (නිවැරදියි)
අත්තම්මාගේ නම සහ මගේ අම්මාගේ නම් අතර ඇති සම්බන්ධය (ඇත්තටම එක සමාන නම් කොටස් දෙකක් තිබෙනවා )
නාඩි වාඛ්‍ය ඇසීමට පැමිණෙන විට පියාගේ වයස (නිවැරදියි)
මම සහ මගේ සහෝදර සහෝදරියන් ගණන (නිවැරදියි)
මම සහ මගේ සහෝදර සහෝදරියන්ගේ ජීවිතවල විශේෂ අවස්ථා එළඹෙන විට පියාගේ වයස් පිළිබද තොරතුරු(ගණන් හදා බලන්න පුලුවන් සිදුවීම් සදහා නිවැරදියි. අනිත් අවස්ථා තවම එළඹි නැත.)
හදමින් ඇති නිවස හා එහි වැඩ පටන් ගත් දින වකවානු

මීට අමතරව තව බොහෝ දේවල් නිවැරදිව කියා තිබුනා. වැරදි යැයි කිව හැක්කේ මමත් මගේ මල්ලිත් අක්කත් උසස් අධ්‍යාපනය හදාරණ ක්ෂේත්‍ර මාරු වී කියවීමයි.

මේ පිළිබදව යම් අදහසක් මා තුල තිබුනත් මෙහි සත්‍යතාව පිළිබද සැකයක් නැත්තේම නැත. ඒ නිසා මෙය පිළිබදව ඔබගේ අදහස් ද දැන ගැනීමට කැමතියි.

නාඩි වාක්‍ය - ඇත්තක්ද? නැත්නම් තවත් හොර සාත්තර කරුමාන්තයක්ද?

විදුදය ශබ්ද කෝෂය (Vidudaya Dictionary) version 1.3 (with Unicode)

2009-04-15T20:38:00.006+05:30

අලුත් අනුවාදය සමග එන විශේෂාංග

සිංහල තේරුම යුනිකේත ෆොන්ට මගින් ඉදිරිපත් කර ඇත
memory භාවිතය අඩු කර ඇත
වැරදි සහිත වචන නිවැරදි කර ඇත
වචන සෙවීමේ වේගය වැඩි කර ඇත

ඔය කිව්වට කව්ද දන්නේ ඇත්තටම ඔව්වා තියනවද කියලා෴෴ check කරලාම බලමු෴

අලුත්ම අලුත් අංගයන් සමග විදුදය ශබ්දකෝෂයේ නවතම අනුවාදය 1.2

2009-03-31T17:57:00.018+05:30

මුලින්ම මේ අනුවාදයේ ඇති විවිධ අංගයන් සදහා අදහස් සැපයූ ඔබ සැමට ස්තූති කරන්නට කැමතියි෴ ඔබ විසින් පෙන්වා දුන් අඩුපාඩු බොහොමයක්ද මෙහිදී නිවැරදි කර තිබේ෴

෴නවමු අංගයන්෴

ඔබ select කරනා වචනයේ තේරුම ලබාගැනීම සදහා shortcut සහ Automatic ලෙස ක්‍රම දෙකක් ඇතුලත් කර ඇත. shortcut ක්‍රමය භාවිතයේදී වචනය select කර Ctrl+Shift මගින් තේරුම ලබාගත හැකි වේ. Automatic ක්‍රමය භාවිතයේදී මුල් අනුවාදයේ ලෙසම select කල සැනින් තේරැම පෙන්වයි.
මෙහි ඇති අකුරු ඔබට අවශ්‍ය ඉංග්‍රීසි හා සිංහල ‍ෆොන්ටයන් අවශ්‍ය style හා size එක සමගින් වෙනස් කිරීමේ හැකියාව පවතියි.
සකස් කල හැකි fade effect එක
පරිගනකයේ memory භාවිතය අවම කර ඇත.
තනි click එකකින් මෙහි ක්‍රියාකාරිත්වය නැවැත්වීමේ හා ආරම්භ කිරීමේ හැකියාව.
right click එකක් මගින් තේරුම සහිත window එක සැඟවීමේ හැකියාව

බලමු අලුත් එක කොහොමද කියලා (Download)

සියපත - සිංහල යතුරුපුවරු පරිවයන තක්සලාව

2009-03-04T19:24:00.004+05:30

මෙය සිංහල යතුරුපුවරුව පුහුණු කිරීම සදහා සකසන ලද මෘදුකාංගයකි෴ මෙහි විජේසේකර යතුරුපුවරු වින්‍යාසය හුරුකිරීම සදහා පහසුකම් සපයා ඇති අතර යතුරුපුවරුව නිවැරදිව භාවිතා කිරීම සදහා අත් ඇගිලි මගපෙන්වීමක්ද සපයා ඇත෴ මින් පෙර සිංහල යතුරුපුවරුව භාවිතා නොකල අයටද භාවිතා කිරීමට හැකි වන ලෙස යතුරු වල පිහිටීම පෙන්වීමේ ක්‍රමයක්ද ඇතුලත් කර ඇත෴ මීව අමතරව පුහුණුවේ සිදුවන වැරදි, සටහන් කර සෑම පාඩමක් අවසානයේදීම වාර්ථාවක් ඉදිරිපත්කිරීම සිදු කරයි෴ අවශ්‍ය විටක තමන් කැමැති සිංහලෙන් ලියවුනු සටහන් භාවිතා කරමින්ද පුහුණුවීම් කල හැක෴
මෙය මෙ‍ම මෘදුකාංගයේ පළමු අනුවාදයයි෴ එහි ඇති දෝෂ හා මේ පිළිබද ඔබේ අදහස් දන්වන්නේ නම් මෙය වැඩි දියුණු කිරීමට මහත් රුකුලක් වනු ඇත෴

මටත් ඕනේ (Download)

විදුදය ඉංග්‍රීසි-සිංහල ශබ්ද කෝෂය

2009-03-04T19:10:00.002+05:30

මෙය පසුගියදා ශ්‍රී ජයවර්ධනපුර විශ්වවිද්‍යාලයේ 50 වස් සැමරැම නිමිතිකොට ගෙන පැවැත්වූ විදුජය ප්‍රදර්ශනය වෙනුවෙන් සාදනු ලැබූ වැඩසටහනකි෴

මෙහි ඇති විශේෂත්වය නම් ඔබේ පරිගනකයේ ඇති ඕනෑම ඉංග්‍රීසි වචනයක් select කල සැනින් එහි සිංහල තේරුම කුඩා popup window එකකින් පෙන්නුම් කිරීමයි෴

මේ සදහා බොහෝ දෙනාගෙන් හොද ප්‍රතිචාර ලැබුනු බැවින් මෙය තවත් වැඩි දියුණු කිරීමට තීරණය කලෙමි෴
ඒ සදහා ඔබගේ අදහස් හා යෝජනාද අපේක්ෂා කරමි෴

download කරන්න මෙතන click කරන්න

යුනිකේත පරිවර්ථකයක්

2009-03-01T10:20:00.005+05:30

මේකත් ජපුරේ ප්‍රදර්ශනය වෙනුවෙන්ම හදපු මෘදුකාංගයක්෴ යුනිකේත අක්ෂර FM_Abhaya වැනි ASCII අක්ෂර වර්ගයකටත් එවැනිම අක්ෂර වර්ගයක් යුනිකේත වලට පරිවර්තනයත් ක්ෂණිකව කිරීමේ හැකියාව මෙම මෘදුකාංගයේ තිබෙන වි‍ශේෂත්වයි෴ මෙම මෘදුකාංගය නිර්මාණයේදී පරිවර්ථන දෝශ අවම වන ලෙස නිර්මාණය කිරීමට උත්සාහ කළෙමි෴ එනමුත් මෙහි තවමත් ඉතිරි වී ඇති දෝශ හදුනාගැනීමට උපකාර වන්න යැයි ඉල්ලමි෴

මටත් ඕන

ආයුබෝවන්

2009-02-27T19:20:00.005+05:30

මේක තමයි මගේ මුල්ම blog එක෴ අවුරුදු 21 ක් තිස්සේ ලබාගත්තු දැනුමයි අත්දැකීම් ටිකයි නිකන් තියාගෙන ඉදලා ඵලක් නෑ කියලා මගේ යාලුවෙක් කිව්ව කතාව මගේ හිතට තදින්ම වැදුනා෴ අවුරුදු 21 ක් කියන්නේ පොඩි කාලයක් වුනාට ඒ ටික කාලෙදි කොච්චර දේවල් ඉගෙනගන්න ලැබෙනවද?෴ ඒ නිසා තමයි මමත් blog එකක් ලියන්න ඕනෙ කියලා හිතු‍වේ෴

මෙතන දැණුම සහ අදහස් හුවමාරු කරගන්න කදිම තැනක් වේවි කියලා මම හිතනවා෴

ඉතින් මගේ මේ පුංචි රජදහනට පොඩිත්තකට හෝ ගොඩ වෙලා යන්න එන්න කියලා මම හැමෝටම ආරාධනා කරනවා෴